Saturday, December 10, 2011

أنا اشتراكي


اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم
*
مسحراتي
منقراتي
في مذكراتي
عن عهد بائد
ولا عمره عائد
طلعت لي غنوه
لا تقول لي حلوه
ولا سفيهه
فيها اللي فيها
باغنى واحكي
غنوه حكاية
كان فيها ضحكي
فيها بكايا
اسمع يا ولدي
العين بصيره
والايد قصيره
والفقر لابد
علي الحصيرة
بيقول يا عابد
زحزحني
والزير حدايا
من البداية
وأنا اللي سانده
علي النقاية
بيقول يا عبده
زعزعني
والقلب شابي
علي الغلابه
رفع علي
قوس الربابه
وقال يا بابا ...
زغزغني ..
اسمع يا ولدي
من غير شماته
دلوقتي ردي
علي التلاته
بنيت في سدي
زعزعت زيري
علي مزاجي
يا اقطاعيه
وغار اذاك
زغزغ لي قلبي
عدو باكي
زحزحت فقري
وأنا فداك
يا مصر لما
لقيت ضناك
أول ما ينشأ
حرية ينشق
أول ما ينطق
يقول وراك
أنا اشتراكي
يا مصر ياللي
اسمك في ريقي
عارف طريقي
*
المشي طاب لي والدق على طبلي
ناس كانوا قبلي قالوا في الامثال
الرجل تدب مطرح ماتحب
وانا صنعتي مسحراتي في البلد جوال
حبيت ودبيت كما العاشق ليالي طوال
وكل شبر وحته من بلدي حته من كبدي حته من موال
*
اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق
 فؤاد حداد - المسحراتى

1 comment: