Saturday, December 24, 2011

اهداء الى الاشتراكيين الثوريين - بستـان الاشتراكيـــة

بستـان الاشتراكيـــة
 
بستـان الاشتراكيـــة
 
افتــح . . افتــاح
اقفــل . . حــول
نقعــد نرتــاح ؟
لأ ،  ح  نكمــــل ، 
ده السد العالى ، شهل
علـى راس بستـــان الاشتـراكيــة ،
واقفيـــن بنهنـــدز  ع الميـــــه ،
أمـة أبطــال ، عُلمـــا ، وعمـــال ،
ومعـــانـــا    جـــمــــــال
بنغنــى  غنـــوة  فـرايحيـــــه 
ننده كلنا ،  ندهة فلاح لاخواته ، ساعة  الرى
حاكم أرضنا ملكنا كلنا  م السـد العالى وجى
ننــده  كلنـا  نــدهــة  قويـــــة
افتــــــح
 افتح، على حوض الورد، أبو تمانين مليون شجرايه
الورد العربـى ، ورد السهـل ، وورد الصحرايـه
أهو كده ، وافتح صفحة ما تشبـع فيها الدنيـا قرايـه
يا فاتح فى الصخر ده للجيل ، ويا النيـل ، مجرايـه
اقفــــل
- واقفل ع الحيـره السيـره وهـات شربـات للكل
اقفل عينـك ، وافتحهـا ، تـلاقـى الشـوك بقى فل
وزهور ليمـون ، صابحـه ف يافا بتضحـك وتطـل
تقول : افتح صندوق العيــد ، وادى الحلــوة مرايـه
" يا حلــم ، يا حلــم ، يابو الليــل ،  يا متزوق
ليلـك سهـرنــاه ، ونـورنـــاه .. بالمبـــدأ ،
            فيه نـاس تقـول فى الصبـاح :  حلمنـا والله خيـر
واحنـا ، الصبــاح ييجى يلقـى الحلــم متحقـق 
حــول
 حـول ، وافرش منديلك لاخضــر ، ع الرملــه ،
حولها جــداول ، ومعامــل ، وحيــاه كاملــه ،
حولنا ، وطـولنـا أملنــا بإيـدنـا العاملــــه
حول علـى فوق ، زى السـد ما طالـع على فـوق ،
الخيـر بيجيب الخيــر ، والفرحـه دى كانت شوق
الشعـب العربى رمـى قيـوده ، وخـرج م الطـوق ،
طالـع ، طالـع للقمـه ، وبيـزرع فيهـا الرايــه ،
قولــوا ورايــا 
 افتـح . . افتــاح
  اقفــل . . حــول
  نقعـد   نرتــاح ؟
 ح   نكمـــــل    ح نكمـــل .....  لأ  ،

1 comment:

  1. الي الأمام دائما لا تراجع الي أن تكسو نجمتنا الحمراء الأراضي الخضراء ولا خطوة للوراء

    ReplyDelete