وشوشة
عن الإحباط وخيبة الأمل
عمرك سألت نفسك إيه الفرق بين الأحلام والأوهام ، إيه معنى التخيل الصحي ويفرق ايه ده عن الخيال المرضي ؟
بلاش الكلام الكبير ده .. خلينا فى الكلام العملي :
عمرك فكرت فى خططك المستقبلية وأحلامك اللى زاحمة دماغك ومحوّلاها لشارع الكل
راكن فيه صف تاني !
عمرك قعدت كده فى شباك بيتكوا وفإيدك كوباية شاى تفكر فى إمكانياتك الفكرية
ومؤهلاتك الشخصية اللى ممكن تُنصرك وتبيّض وشك وتحققلك أحلامك فى معركة الحياة !
فكرت إنّ انهاردة أخبط على باب دماغ جنابك وأعزم نفسى عندك وانكش فى أعماق
فكرك وشجعك تنطف المنطقة دي من جسمك وتعملها حملة ترتيب .. تفصل فيها الأحلام
الوهمية الحامضة عن باقي أحلامك و تعرف انت عايز إيه .. تصلّى ع النبي كده
وتطرد كل الأرواح والأشخاص اللى نِفسك تبقي نسخة منهم علشان مفيش حد بيبقى حد غير
نفسه وبس .
إسال نفسك سؤال ف الخباسة كده وقول : أنا مين وعايز أبقي إيه ومعايا مؤهلات
إيه علشان أبقي اللى أنا عايزه ده ؟!
( والمؤهلات هنا مش الشهادة المتعلقة صورتها فى صالون بيتكوا .. دي تقييم
شامل كده لعلمك وثقافتك وسلوكياتك وقدرتك على التفاعل مع المجتمع والناس واللى
تقدر تقول عليها فى الملخص انها رأس مال مشروع حياتك ) .
أهم حاجة فى آخر القعدة الحلوة دي إنك تلاقي إجابات لنفسك لإن ده
الإمتحان الوحيد اللى لا حتلاقي حد يقولك ذاكر ولا حد يقولك ركز وجاوب .. امتحان
الحياة مفيهوش غير نتائج ..الناس بتشوف وصلت لأيه فى النهاية وبس !
نصيحة أخيرة بقى قبل ممشي :
بلاش تبص على اللى فات كي لا تصاب بالإحباط وبلاش تنتظر نتيجة أكبر من
امكانياتك كي لا تصاب بخيبة الأمل .
بقلم : Radwa Amer
No comments:
Post a Comment