علقت كل الأحمر

من ديوان : علقت كل الأحمر

لــ : خالد جابر

أوراق  من درج بورخيس

                                                        تداعي للمجهول

ولما انتشرت الدوشه

من فرط الزحام

                       تهنا.

........

ماتيجي نموت

ونتقابل نكمل كل مواضيعنا

..هناك

لكن تفتكر

هيسبنا نشرب فنجانين قهوه

ونتكلم 

تفتكر نقدر نموت أصلا !؟

مليت لوحدي هناك من طول انتظارك

وبفكر ابعتلك رساله!.

                        رسائل لها

.1.

جميل الاشتياق فعلاً

وعارف ..

إنك لسّه مشتاقه

بتسقي ورودي ف السموات

وبتعدي المكان لوداع يليق بينا

(ودعا أدم اسم امراءته حواء لأنها أم كل شئ حي).

لذا أبدا مبنكرش

وجودك فيا ف المطلق

.2.

في السوق

مشاعرنا

 مشاع

 سوء زي رواد المكان.. 

من غير ملامح

(يعني إيه كل اما اضمك

 ألقي المطر  خايف يقرب

يعني  إيه كل اما يرجع  جزء مني

 جزء تاني ليكي  يهرب )

ملقتش باب فاضي

أنسق فيه الغنائيه

حتي الأغاني

ف المكان ده بدون

ملامح .

الفرق كان  في الصوت

وكان للبحر صوت

مع زرقة التروماي

وكان لهذا المكان صوت

 مع ترامه الرتيبه

بيقتل أي صوت .

.3.

إعتدت اعبي التاريخ

ف أزايز البيره

اكتب لكل الناس

عنواني ع الحيطه

الورقه

التربيزات

يمكن تكوني ف إيد

شخص التقي العنوان

فنتقابل ..

صدفةً طال انتظارها .

بتطول مسافة البعد كل ما نقترب

بتكتبي اسمي للمكفوفين

وبتستهجي كام ذكرى ما بينا

لكل طلابك ضعاف السمع .

وانا ..

أوزع جرحي  تكشيره

تسد نفس  زباين القهوه

معرفش غير الهم..

الرغي السياسي.

بروح 

أعبي ذكري يوم عدي

وأسأل أي تفصيله

تنام جمبي

.4.

أما بعد المعتاد

إتعرفي عليها 

هي الشريكه الجديده

انتى  المسمي اللي اختلفنا عليه.

               رسالة وحيدة منها

دلوقتي تقدر تكتشف

شخصية الحلم اللي فكر يوم يجيلك

بس واجه ألف حاجه مانعه عينك

هل حقيقي

إنك انت الخوف ف نظرات المرايا ناحيتك

الضلمة.....القعده وحدك....الحقيقه ..!  .

لسه نفس الدايره موجوده

ترسم فراغك فيها وتمدد

تكتشف انك..

نقط

وان الصراع الداير بين محاولة فهمك الواقع ونومك

خلاك مجرد ضل .

                                   ارهاصات "القرين"

بيحب  زيي  أدوات الكتابه

وبيعشق حنه مينه

هذا الملاك الاخير

المعاد اللي دايما بخلفه

رسولي لبقية البشر

أو نفس تالته غير انا وانت .

                     من هامش الأوراق

الكفر اسهل  م الايمان .

وكان  للرب  في ذلك رؤي اخري.

هيعدي  هذا الوقت

بالطول المناسب لاي  عارض هم

هتتخلي عن الذاتيه المفرطه

وهتاخد الاسباب  ف جيبك

وتنطلق وحدك .

 

يا ايتها الشمس  المطمئنه 

انا ليل طويل ف ماليش

نصيب فيكي .

سلامُ علي دميتي الحمراء

اللي  عارفه كل شئ

عني .

.فاصل

خد كل شئ واديني وعد الرجوع

الموت اقامة صلاه ....

اجباري فيها الخشوع!

والدمع عامل مشترك بين الجراح

والبوح

وفراقك انت الم

زي انتزاع الروح  .

عامل مشترك

بيني وبينك حاجات ما تجوزش غير لينا

فجأة بقينا مشاع للناس نصيب فينا .

بينك وبين امي

في عامل مشترك

كانت تعمل عروسه ورق

كل ما بعمل ذنب تشكها بإبره

وانا قلبي ليكي ورق .

بينك وبين والدي

في عامل مشترك

 بينزل كل يوم  الفجر

يرجع وانا نايم

عمري ما حسيت بيه

غير لما جبت البطاقه

فكنت مجبر أقول إسمه ورا إسمي .